عشان شاعر
خدتنى الدنيا ولهتنى ومت كتير
اخر نفس فى العمر وقت الموت
مش هوه الاخير
وايه هيفرق
بين خيوط العنكبوت
وبين دراعات اخطبوط
لفريسة بتودع سنين تكشير
اخر نفس
وبيودع فى الحياة على مهل
كبلياتشو
وبيخطى الحياة فوق حبل
ولما بيوصل فقرة الطرابيز
يشوف الدنيا على حالها
ف يختار فى الحياة الاصعب
بميزان تقيل بيطب فيه السهل
الحب اصله كان ذكر
بيحب ملكة نحل
فيه شئ علمنى بالصدفة
اكون شاعر وانا لبيت
ف طوفت الارض والسموات
ومين رحال فى شرع الحب
يملك بيت
مع انه يوماتى ليه ابيات
ولما الغربة بتوشوش حيطان نفسه
بتهرب روحه للمجهول
واوضته تضيق
وترسم دنيته الصعبة شبه ضحكة
لشبح انسان
رغم طيبته ليه خطايا
وهوه اصلا مش برئ
لسان حال اخر النظرات وقت الوداع
لا انا حبيت ولا اتحبيت
اتارى الحب تعويذة صابتنى اللعنة
من بدرى ولا حسيت
خلاصة عمر متكتف
فى مولد دنيتى المفتوح انا وانتى
ف حبيتك ووضيتك واميتك ولا صليت
الليل
ستاير
او جدايل
او كاسات
عجوز عاش الحياة معزول
سياسة بتفرض الواقع
على شاعر ف خاف ليقول
على سر الحياة اللى
طول الوقت بيشاغل
ف باب مقفول
وقلب وحيد كوحدتنا
يشاكل كل اضلاعه
ف يصبح حاضن الدنيا
يبات مقتول
.......................................
sameh shebl
ليست هناك تعليقات:
إرسال تعليق