كل الخواطر $$ أنا ولطيف $$ للشاعر المبدع أ / محمد ضباشه

أنا ولطيف
محمد ضباشه

أنا ولطيف
وحال سخيف
وجيوب حياتنا مقشفرة
لا هي غاوية كيف
ولا هي ضيف
قي بيوت وشوشها مكشرة
والجوع بيصرخ في العيال
وأم العيال متشمرة
عينيها حنفية دموع
بتبيع في باب المندرة
علشان رغيف
وفي يوم كفيف
والناس عينيها مغمضه
م الصبح بدري متوكلين
نطلع لحوسة
ننزل في طين
مع كدابين
مع غشاشين
مع نصابين
مع ريح بيطحن عضمنا
علشان جنية
تمن الرغيف
وياريت نضيف
يا حلمنا
يا حزننا
يا أهل المدد
جيبنا أتخرم
نزل مفيش
عاوزين نعيش
ولبسنا خيش
وصبرنا فقد الأمل
واللىل يطبطب علي اللي راح
يرجع يقول أيه العمل
ليه الصباح أصبح نواح
والخلايق بتذل فينا
علشان رغيف
ولما تاه مني لطيف
وفضلت أنا
الخطوة تصرخ خوف
وأقعد أنادي علي الهنا
أفرد جناحي للسما
ما يبل جوف
أقعد أطبطب ع الوجع
ويا ريت يشوف
حال الغلابة اللي وقع
ويا ريت يشوف
ريحة حتي لصبرنا
أو حلمنا
تقوي حتي ضعفنا
وتحن علينا برغيف
أنا وولاد لطيف