?يعني أيه ادمان
للشاعر محمد ضباشه
يعني تعود---- والتعود
في الحقيقة شيئ يقين
أني أبقي عبد لحاجة
وتذلني دا شيئ مهين
تشدني وأجري من سكات
طير يطير من غير عينين
وأفتكرها من الترف
وهي القرف بتوب حزين
يعني بانجو أتوه معاه
يعني كاس غرقان في أه
يعني قرص ما تعرف أيه
يقوي عضلة بكاه
يعني أي شيئ يزيد
وما تقدر تقوله لا
وتعمل مصايب سودا
وأنت بتجري وراه
والصراخ جواك يدلك
? ألحقوني أروح لمين
يعني تلعب في العقول
يعني تتهد الأصول
يعني تتدمر حياتك
وشيطانك دايما يقول
أنا بهرب من ظروفي
حاجة بتطمن لي خوفي
يا مرايتي قومي شوفي
خط تجاعيد السنين
يعني رعشة في اليدين
يعني مش شايف لفين
يعني ناسي أي حاجة
يعني رافض أي حاجة
يعني مش عارف منين
ألقي فرحي وأداوي جرحي
يا دنيتي
? الصح فين
أرجع وأعود لنفسي
ألاقي نفسي في خطوتي
نزرعها صبر
ترتد جبر لبلوتي
وأقول خلاص
يا أهل الخلاص
مر صداعي وشكوتي
رجعوني أدندن من جديد
علي لحن عاشق غنوتي
ليست هناك تعليقات:
إرسال تعليق