( مربعاتي .. حياتي )
~~~~~~~~~~~~~
مسا طاير لناس غاليين على قلبي
مسا غالي بعطر الورد متعبي
على جناح الهوى ناوي يروح ليهم
يهنيهم ويرسم ضحكة ف عنيهم تفرحني
~~~~~~~~~~~~~
سنين عمري فايته وسايبه جروح
حاسس بغصة وجع واصله لحد الروح
سألت عنه الودع قال الودع سيبك
البخت مال ياجدع قلب الجدع مجروح
~~~~~~~~~~~~~
سنين عمري ومنقوشة
وباحلم قاعدة الكوشة
وجانبي عروسة م الجنة
وسكه بورد مفروشة
~~~~~~~~~~~~~
سنين عمري ومعدودة
وفيها أحزاني مفرودة
ممدودة بحبل وطوق
على وسطي ومشدودة
~~~~~~~~~~~~~
سنين عمري وبتعدي
كما الرهوان ولا تهدي
واقول يمكن تحن ف يوم
وترسم ضحكة على خدي
~~~~~~~~~~~~~
سنين عمري ومحبوكة
بتقطع فيا بالشوكة
ونهر عذابي متواصل
مفيش فاصل ومشبوكة
~~~~~~~~~~~~~
سنين عمري وجراية
وحكاية ورا حكاية
يعدي العمر وف ثانية
وتهرب مني ضحكاية
~~~~~~~~~~~~~
سنين عمري وطايرة لفوق
وسيباني ماليني الشوق
أنام واصحى وأتمنى
أزور البيت وبالي يروق
~~~~~~~~~~~~~
سنين عمري مابين ومابين
وإنا التايه مابين لتنين
بتسعدني وتزعل آه وتوجعني
وتحضني وترزعني قوام قلمين
~~~~~~~~~~~~~
سنين عمري ودايب دوب
وراضي يامه بالمكتوب
مجروح وجرحى يوجعني
وإيه يعني أبات مغلوب
~~~~~~~~~~~~~
سنين عمري بطاطي لها
تغيب عني واحن لها
تشوف ف عنيا أحزاني
تغيب تاني تشعللها
~~~~~~~~~~~~~
صاحبي ناداني تعالى
سندت ضهره بمخلابي
ولما ناديته تعالى
وقت ضيقتي خلا بي
~~~~~~~~~~~~~
سنين عدت على الفاضي
وحبيبي بيا مش راضي
وسوء حظي بيساهم
وانا فاهم ومتغاضي
~~~~~~~~~~~~~
سنين عمري ودبحاني
وانا الغرقان ف أحزاني
ولما حلمت أحط ف شط
لقيت أحلامي بيعاني
~~~~~~~~~~~~~
بقلمي ..
معوض حلمي
منشأة بطاش
تمي الأمديد
دقهلية
ليست هناك تعليقات:
إرسال تعليق