زجل فلسطيني
.
كتبتك يا وطني بدموع.. المسك منها يفوح
بدموع خنساوات.. مرة تزغرد، ومرة تنوح
بوجع غصن الزيتون.. وزيت ثمره المذبوح
دبكتك دلعونا.. يطربلها.. ال ييجي ويروح
.
يا وطني الغالي.. بالله لا تعتب علي
أنا تعبت روحي واتكسرت فيك رجلي
لا عارفة أعيش ولا طايلة هوا أو مي
يا وطني الموت بشوفه بشمس وبفي
.
فلسطين يا أرضي.. تاهت قوافلنا
ضعنا بوطنا.. وتغربنا.. والحق إلنا
قطعتنا حدود وآه يا خسارة بيادرنا
ساق الله قطف وحصاد يا مواسمنا
.
ساق الله وستي في الدار.. تدللني
وشو في نِعَم ثمر عالشجر.. تناولني
ساق الله.. أيام كان سيدي يعلمني
وعمتي تحكي عن الزرع وتفهمني
.
يا وطني.. انا ضاقت بعمري.. دنياي
فقر وغلا.. وأحوال تبكي عليها الناي
أنا بنت فلسطين انسلب فرحي بحناي
أنا بعشقك يا تراب وثابتة عليك خطاي
.
ساجلـوك يـا حـرف بقلبـي.. تعب مــا تـاب
يـا عيـون فكرتــي.. يـا ميـراثــي.. والعِتـاب
يـا فنـون الشـعر بشـرايـيني.. قـلـم وكتـاب
واللي ما يكتب فضفضة مشاعره كبته عذاب
.
.
بقلم
ريمة معلا
همس الظلال
.
ليست هناك تعليقات:
إرسال تعليق