الناس ......... عاميّة
..................................
الناس بتكلّم نفسها /// ومش عارفه الصح فين ...!!!!!
ولا قادره تمسك نفسها /// م التوهه , والسكّه منين ؟
=============================
الناس بتصرُخ ياخلق /// رايحين ف سكّه مَتاهه
والروح محشرجه ف الحَلق /// من أسى الدنيا , وبلاها
=============================
ناس بتزرع في الفِتن /// وناس بتحصد شرّها
وناس غرقانه في المِحن /// بتنكوي بنارها , ومرّها
=============================
مركب واخدها التيار /// والموج عليها عالي
ونار بتحرق في نار /// يارحمة ربنا تعاااااالي
============================
إرحمنا يارب الناس /// ورسّينا على بر هادي
دا الهوجه في الوسواس /// والفتنه في كل وادي
============================
إرحمنا د احنا غلابه /// ومالناش في السياسه
وأكلت قوتنا الديابه /// وفرضت علينا الحراسه
===========================
يارب ياعالم بحالنا /// دا انت رب قلوب
ومن إمتى الفرح جالنا /// الصبر يا أيوب
===========================
والصبر في قلوبنا نَفَد /// ونْجيبُه تاني منين ؟
لأ ويقولوا دا حسد /// مِيْت وَكْسَه ع الحاسدين
===========================
بيحسدونا على إيه ؟ /// ع الفقر اللي نوعه ( دكر)
والاّ ع اللّي احنا فيه /// ومين فينا بس افتكر ؟؟؟؟
============================
رحمتك ياللّي تملّي /// إنت الوحيد اللّي لينا
توطّي والاّ تعلّي ..... /// برضه حبّك مالينا ...
============================
ليست هناك تعليقات:
إرسال تعليق