(أحلي نشيد )/ قصة حقيقية
ب الله أكبر
بارليف كان خط رصاص
بأستيكة أبطالنا مسحوه
خمسة ساعتها كان سني
وفرحت فرحة أبويا لما الدمعة
فرت من عينه وحضني
وشالني و في الهوا حدفني
وشقطني
وقالي عبرنا يا وحش عبرنا
عبرنا يا حمدي
وفرحت وأنا مش عارف معني عبور
بعد ما خد نفسه م الفرحة
قالي القنال عدينا
والنكسة من زمان كسرتنا
و النهارده خدنا بتارنا م اللي كسرنا
ومن تاني رفعنا علمنا
وعلي عدونا علمنا
وربي نصرنا
وعبرنا ياحمدي عبرنا
وفضل كام مرة
م الفرحة يكررها
وشرح لي
وهو شايلني وعلي كتافه
مدلدلة رجلي
انتصرنا باسم الله
انتصرنا لما بقينا واحد
كان بحماس بيكلمني
وم البيوت الناس خرجت
فرحة مش سيعه قلوبها
ولا سايعة حواريها ولا شوارعها
فهمت ساعتها
يعني ايه معني النكسة وحسيتها
ويعني معني عبور
و يعني ايه معني النصر
وهتف وبصوت عالي
وهتفت معاه والحتة ترن زغاريدها
بسم الله الله أكبر باسم الله
تحيا مصر
تحيا مصر
تحيامصر
حمدي صالح
ليست هناك تعليقات:
إرسال تعليق