(افتكر انَّا قدِّمْنا النوايا )
الروشتة فى الجاكتة
فضل منك
لو تفَعِّلها بطبيب
المنافس ,
والمُطهَّم بازدراؤه ,
والحبيب
صيدلانى العشق باخلِط
بين جباية
وبين سحابة مطرت
خل وزبيب
فضل منك
تروى شُوقَة مغرَّبة
ومترَّبة ,
ونار بتشعل فيها تحرَق
هجر قاسى ,
دلال بيغرق ف المشيب
فضل منك
تنزل لحد القاع وتعرف
مين بعانى ,
ومين سيجارُه طول دراعه
ومين بحلفط غلوَشَة
وتضيع نفوس
الطقوس بتشِع خيبة ودهولة
واللى فوق عمره ماينزل
للى تحت ..والقدوس
مش لاقى رزُّه
واللى ف الحَلِّة الحجارة
نغلى فيها تنام ولادنا
قبل جوعهم يبقى مارد
ليه تسيب الودن تسمع
مستغل ,
ومنتحل بيبع ضميره
للى شرَّق
واللى عرَّب
واللى فوق ضهر الغلابة
داس وصاعد
فضل منك
تفتكر انَّا قدِّمْنا النوايا
والخبايا
وقومنا ليك نهتف زعيمنا
لو شردت عن دروبنا
أوعى لو شيلنا التحية
اليوم تلومنا
لسَّة فرصة تجيب لبنتى
توكة حلوة ,
وجيبة خضرة
المحاضرة مش كلام
المحاضرة بالمناصرة
شِيل همومى
وزيح غيومى
امسح خدودى م الدموع
شوف نهار يطلع علينا
ينسف ضلام الليل بطوله
وسهد جزع
فضل منك
تتلاقينا نقول لبكرة
مرحبة بخيرك يا بكرة
وأى فكرة غير أمانا
تبقى شر
اللى بيزَقَّط ولادُه
بالهنا
ملك غيره
عمره ما يكون أو يقِر
روحه طايره ف السما
وقلبه حر
الشاعر وحيد راغب
ليست هناك تعليقات:
إرسال تعليق